Lienīte Slišāne
Rūkdorbnīce, muokslenīce. Lienīte pīdzyma 1976. goda 9. decembie. Ontona i Irenas četru bārnu saimie.
Ar rūkdorbīm mamma ļāva dorbuotīs jou nu bienības: ņimtīs i putļuot komulīšus, puoršyut mammas vacuos kleitas, šyun kleitas jaunuokejai muosai. Piec Upītes pamatškolas beigšonas aizīt muocietīs iz Rēzeknes muokslas koledžu, rūkdorbu specialitāti. Piec koledžas beigšonas muocuos LU Pedagogejas i psihologejas fakultatie par muokslas pedagogu. Piec LU beigšonas suok struoduot Nacionalejā teātrie. Suokumā par garderobisti i biļešu kontroleri, vāluok par gaismu inženeri, gaismu muokslenīci. Piec Latvijas Nacionāluo teātra rekonstrukcijas ķļiust par Jaunuo zala izruožu atbildeigū gaismuotoju, tod tīši ari Lienīte atsagrīž teatrie piec dāla Osvalda pīdzymšonas.
Adiet Lienīti īmuoceja vacuokuo muosa Annele. Lienīte oda jou nu mozu dīnu. Suokumā adeja džemperus, capures, šalles. Lienīte oda vusuodas zvāru zečes. Lienītes adietuos bitīšu zečes ir sastūpamas ari Upītes izlaušonas ustobā “Pīci panti”. Upītes kultūrtelpa ir zynama ar Upītes logo. Upītes logo ir atrūnami ari iz Lienītes adietejīm cymdīm i šyutejīm hūdijim
Lienīte Slišāne ir izguojuse šyušonas kursus i šyun interesantas, sova dizaina bikses i kraklus. Pādejā laikā vairuok šyun hūdijus ar izšyutajīm dāla iniciāļim – O(sirsnine)R voi Upītes logo.
Lienītei ir loba telpu muokslinīciskuoi izjiuta. Nu mozuom dīnuom tāta ar mammu ir ļāvušs bārnīm radūši izapaustīs, tuo tika izremontietas ustobas sovā dzeivūklie, tuo ari Upītes pamatškola tyka ītierpta prīcīgūs kruosu salykumūs, tuo izremontieta mammas klase, tuo prīcīgu nūskaņu īgiva Upītes bibliotekas telpas.
Lienītes ilustracejas ir vairuokuos juos tātas Ontona Slišāna gruomatuos: “Olūta smielieja”, “Upītes ābeļdārzs”, “Ar myužeibu sasarunoj”, “Salnas nenokosts zieds”.
2013. godā Upītie tyka izsludynuota Ontona Slišāna 65gadei veltieta portretu izstuode – Lienīte itai lītai pīit orģināli, jei tātas portretu izoda nu boltīm i malnīm vylnas dīgīm.
Nu 2013. goda Zīmassvātku laikā Lienītes adietuos capures rūtoj Latvejas Nacionaluo teatra Atlantu golvas pi īeja durovu, teatram tūp ari Lienītes adieta afiša.
2020. goda rudenie Lienīte īsnādz sovu lylformāta adejumu “Dēliņ es arī Tevi mīlu” Bulduru izstuožu noma reikuotajā konkursā izstuodie "JĀ/NĒatkarība". Dorbu darynova laikā piec dāla traģiskuos aizīšonas. Konkursa žūreja ņūvierteja itū dorbu par lobuokū, ar tū dūdūt īspieju piec goda izstuožu nomā sareikuot sovu personālizstuodi. Tuo suokuos Lienītes dorbs pi vīna nu apjūmīguokejīm Lienītes adejumim 320x780cm lyluo dorba “Cietsirdīgās spēles”. Itys dorbs ir Lienītes savdabīga dīnasgruomata, kur ir apkūpuoti citāti nu vusuom izruodiem, kū Lienīte ir gaismovuse i struodovuse kuo gaismuotoja. Lienītes adejumi tūp nu dabīguos vušku vylnas, adāti ai rūkuom. 2021.goda decembrie sovu iztuodi Lienīte Slišāne nūsauce ”Uzdevums”, jū izstuodie tyka izlykti adāti dāla rūkroksti nu dažuodīm uzdevumīm, kas Lienīti uzrunova nu dāla školas laiku burtnīcuom. Piec Bulduru izstuožu zāles, izstuode aizceļoi iz Namateriāluos kulturas montojuma centru “Upīte” i tod iz Latvejas Nacionalū teatri.
Spīd te, lau uzzynuotu kuo Lienītei veicuos Nacionalejā teatrie
Tādin Lienīte studej Latvejas Muokslas akademijā maģistraturā tekstilmuokslu.
“Man adiešona ir maģiska darbība – vīns dīgs i divejas odatas, i rūnuos dažuodas lītas. Adiešona nūmīrynoj, jei ir kuo meditaceja. Adiešona samazynoj sirdsdarbības ātrumu i stresa hormona kortizola daudzumu asnie, kas samazynoj bailes, trauksmi, stresu i paleidz nadūmuot par… “
Izstuodes
Tekstilminiaturu izstuode “Iztēle ir realitāte”. Roberta Mūka muzejs Galēnūs. 09.01.2023. – 24.02.2023.
Izstuode/konkurss “Cik vērts?”. Bulduru Izstuožu noms 15.12.2022. – 30.12.2022.
Latvejas tekstilmuokslas asociacejas i Latvejas Muokslas akademijas tekstilmuokslas nūdaļas tekstildorbu izstuode "Rudens vakarēšana Rīga-Kedaiņi" Janinas Monkutes - Marks muokslas muzejā Kedaiņos, Lītuvā 28.10.2022. – 03.12.2022.
Latvejas tekstilmuokslas asociacejas i Latvejas Muokslas akademijas tekstilmuokslas nūdaļas tekstildorbu izstuode “Tekstils pilī” 11.06.2022. - 10.08.2022. Cesvaines piļs muzejā.
Personalizstuode “Uzdevums” 10.05.2022. - 10.11.2022. Latvejas Nacionalīs teatris.
Personalizstuode “Uzdevums” 19.02.2022. - 22.04.2022. Namaterialuos kulturas montojuma centrs “Upīte”.
Personalizstuode “Uzdevums” 18.12.2021. - 12.02.2022. Bulduru izstuožu noms.
Adietū zeču izstude “Zvāru zečes”. 2015. Upītes kulturviestures muzejs.
Tātas reikuotuos izstuodes Upītes kulturviestures muzejā:
Grafiku izstuodes “Olūta smielieja”, 2000.
Grafikas izstuode 1998.g
Pīzadaleja ikgadejuos muokslas dīnu izstuodies.
Apbolvojumi
Golvanuo bolva konkursa izstuodie “JĀ/NEatkarība 2020”, Bulduru izstuožu noms.
“Spēlmaņu nakts 2019/2020” bolva “Gada gaismu mākslinieks”.
“Spēlmaņu nakts 2012/2013” nominaceja “Gada gaismu un video mākslinieks”.
Roksts īvītuots 2022. goda decembrie