Upītes Uobeļduorzam 18
Upīte, vacuokīs latgalīšu festivals, mīlestības dzeja i dzīsme, rudenīgs līts, daudzi draudzīgu ļaužu, daudzi Latgolas dyžgoru, "Upītes Uobeļduorzs" svin sovu 18 godu jubileju. Namainīgi jou nu 2002.goda festivals nūteik trešejā septembra sastdīnie. Šūgod tuopat kuo pyrmīs festivals, tys nūteik 21.septembrie.
grupa "Kei-Rei"
Upītes Uobeļduorza himna
grupa "Linga"
Paļdīs dzejnīkam Ontonam Slišānam, juo ideja par dzejas dīnu festivalu viel godsymta suokumā ir bejuse tik loba, ka kotru godi tei aug, dzeivoj i atsateistuos i šūgod sasniedze pilngadību. Kotru godi mes varam klausietīs dzeju, izbaudiet dzīsmes, sajust muojīgumu, izbaudiet latgaliskumu.
Šūgod apmeklietojus ar jautrīm jūciņīm prīceja festivala vadietojs Jānis Skutelis, prūtams, kuo eists latgalīts svātkus vadieja latgaliski. Svātkūs eipošā vītā tyka lykti dzejnīki, jī sieduost šyupulies laseja sovas dzejas ryndas, bet storplaikūs storp dzejnīkīm muzikanti suokūt nu folkloras i beidzūt ar smogū roku izšyupynova skateitojus.
Mozs īskots Uobeļduorzā ar Latgales TV aci.
Lyls paļdīs grupai “Kei-Rei” – par svātku atkluošonu, kuras daleibnīki ir festivala vīnaudži! Paļdīs #FKUpīte par dzīsmiem i eipošū vokora noglu – danci “Lipindraks”. Saļņovas kapela ļāva īzajust kuo eistā zaļumballie. Žvūrgzdyni – bārnu rokgrupa nu Rēzeknes puorsteidza ar spiecīgu dzīdojumu. Santa Savicka-Drozdova pyrms Uobeļduorza pate pīzasaceja dzīduot festivalā, prūtams, ka vīnovamies. Ja leidz šam Santu mes nazynovam, tod tādin īpazynam kuo skaistu i spiecīgu dzīsmu i bolss eipašnīci, super! Turpynojumā grupa “Dabasu Durovys”, kas šūgad “Upītes Uobeļduorzā” jou uzastuoje 13.reizi. Viel izbaudejam ģitāras virtuozu Rihardu Krilovu, dzīsminīku Vinsentu Kūkoju. Turpynojumā lylu puorsteigumu sagatavova grupa “Napruots”, kas piec dažu gadu puortraukuma otkon suokuse muziciet, prīks! Festivāla eipašī gosti grupa “Linga” tautas noma zāli pīpildieja tuo, ka nebeja kur pat odatai nūkrist. Paļdīs jīm par tū, ka vīnu dzīsmi centuos nūdzīduot latgaliski. Tuoļuok grupas “Unknown Artist” i “Gandreiž 10nīkā” izdancynova jaunīšus i festivalu mīļi i svinīgi nūsliedze meiteņu grupa nu Rēzeknes “Trešīs Ņūtona lykums”.
pasuokuma vadietojs Jānis Skutelis
Paļdīs Uobeļduorza dzejnīciem – Mārītei Slišānei, Līvijai Liepdruvietei, Ilzei Spergai, Dagnejai, Annai Rancānei, Inetai Atpilei-Juganei, Ligijai Purinašai, Mārītei Bikovskai i Karonhisakei.
dzejnīce Anna Rancāne 
Skatietoji, klausietoji, doncuotoji
Lyls paļdīs Valsts Kultūrkapitāla fondam, bīdreibai “Upītes jauniešu folkloras kopa”, SIA “DOLO”, SIA “ADVORS”, ZS “Kotiņi”, SIA "Anneles zeme" i Viļakas nūvoda dūmei.
Iz sazatikšonūs Upītie jov 19.09.2020. vacuokejā latgalīšu festivalā pasaulie “Upītes Uobeļduorzs”.
#UpītieDzeiveJauka!
